കോഴിക്കോട്
10 ഫെബ്രുവരി 2024
മുൻഗണനാ റേഷൻ കാർഡുകള് അനർഹമായി കൈവശം വച്ച് റേഷൻ ഉത്പന്നങ്ങള് വാങ്ങിയവർക്കെതിരെ നടപടി തുടങ്ങി. ഓപ്പറേഷന് യെല്ലോ' എന്ന പേരിലാണ് ഈ പരിശോധന പുരോഗമിക്കുന്നത്.
കഴിഞ്ഞ ദിവസം കാക്കൂര്, നന്മണ്ട പഞ്ചായത്തുകളില് കോഴിക്കോട് താലൂക്ക് സപ്ലൈ ഓഫീസര് കെ.കെ മനോജ് കുമാറിന്റെ നേതൃത്വത്തില് നടത്തിയ പരിശോധനയിൽ പരിശോധനയില് 19 മുന്ഗണനാ കാര്ഡുകളും മൂന്ന് എഎവൈ കാര്ഡുകളും അഞ്ച് എന്പിഎസ് കാര്ഡുകളും പിടിച്ചെടുത്തു. ഈ കാർഡുകൾ ഉപയോഗിച്ച് അനധികൃതമായി വാങ്ങിയ റേഷന്സാധനങ്ങളുടെ കമ്പോളവില ഈടാക്കുന്നതിനായി കാര്ഡ് ഉടമകള്ക്ക് നോട്ടീസ് നല്കി.
നേരത്തെ മടവൂര് പഞ്ചായത്തിലെ ആരാമ്പ്രം , മടവൂര് ഭാഗങ്ങളില് നടത്തിയ പരിശോധനയിലും അനര്ഹമായി മുന്ഗണനാ കാര്ഡുകള് കൈവശം വെച്ച 10 കാര്ഡുടമകള്ക്ക് നോട്ടീസ് നല്കിയിരുന്നു. കൂടാതെ കക്കോടി പഞ്ചായത്തില് ജനുവരി 30ന് നടത്തിയിരുന്ന പരിശോധനയിലും അനര്ഹമായി കൈവശം വെച്ച മൂന്ന് എ.എ.വൈ 12 മുന്ഗണനാ കാര്ഡുകള് പിടിച്ചെടുത്ത് നോട്ടീസ് നല്കുകയുണ്ടായി. വരും ദിവസങ്ങളിലും താലൂക്കിലുടനീളം ശക്തമായ പരിശോധന തുടരുമെന്ന് താലൂക്ക് സപ്ലൈ ഓഫീസര് അറിയിച്ചു.
അനര്ഹമായി കൈവശം വച്ചിരിക്കുന്ന മുന്ഗണനാ റേഷന് കാര്ഡുകള് തിരിച്ചെടുത്ത് അര്ഹരായവര്ക്ക് നല്കുന്നതിനുള്ള കര്ശന നടപടി സ്വീകരിക്കുമെന്ന് ഭക്ഷ്യ സിവില് സപ്ലൈസ് മന്ത്രി ജി.ആര്. അനില് നേരത്തേ വ്യക്തമാക്കിയിരുന്നു. അനര്ഹമായി മുന്ഗണനാ കാര്ഡ് കൈവശം വച്ചിരിക്കുന്നവര് എല്ലാവരും കാര്ഡ് ഉപേക്ഷിച്ചിട്ടില്ലെന്നും ഇനിയും അനര്ഹരുടെ കൈകളിലിരിക്കുന്ന റേഷന് കാര്ഡ് കര്ശന നടപടികളിലൂടെ തിരിച്ചെടുത്ത് അര്ഹരായവര്ക്ക് നല്കുമെന്നും അദ്ദേഹം മുന്നറിയിപ്പ് നല്കി.
അനര്ഹമായി ആരെങ്കിലും മുന്ഗണനാ റേഷന് കാര്ഡ് കൈവശം വച്ചിരിക്കുന്നത് ശ്രദ്ധയില്പ്പെട്ടാല് സിവില് സപ്ലൈസ് വകുപ്പിനെ അറിയിക്കാനും നിലവില് സൗകര്യമുണ്ട്. പരിശോധനയില് റേഷനിംഗ് ഇന്സ്പെക്ടര്മാരായ ഷെദീഷ്, വിഗീഷ്, നിഷ വി.ജി, പവിത കെ, മൊയ്തീന്കോയ എന്നിവര് പങ്കെടുത്തു.