പാലാഴി
24 സപ്തംബർ 2025
തോടിന് കുറുകെയുള്ള പാലം പൊളിച്ച് നീക്കിയതോടെ പാലാഴി അത്താണിക്ക് സമീപം മക്കാട്ട് താഴം പുതുക്കിടി പ്രദേശവാസികളാണ് ദുരിതത്തിലായത്. പാലാഴി കേന്ദ്ര ഖബർസ്ഥാൻ പള്ളി, എമറാൾഡ് ഇംഗ്ലീഷ് മീഡിയം സ്കൂൾ, അൻവാറുൽ ഇസ്ലാം കേന്ദ്ര മദ്രസ, എന്നിവിടങ്ങളിലേക്കും പ്രദേശത്തെ നിരവധി വീടുകളിലേക്കും നേരിട്ട് എത്താവുന്ന കോൺക്രീറ്റ് പാതയിലെ പെരിങ്കൊല്ലൻതോടിന് കുറുകെയുള്ള പാലമാണ് പൊളിച്ച് നീക്കിയത്. പിന്നീട് പ്രവർത്തികളൊന്നും നടന്നില്ല.
താല്കാലികമായി മരം കൊണ്ട് പാലമിട്ടെങ്കിലും കനത്ത മഴയിൽ പാലം ഒലിച്ചുപോയി. ഇപ്പോഴുള്ള മരപാലത്തിലൂടെ നടന്നുപോകാൻ പോലും കഴിയില്ല.
നിലവിൽ മറ്റ് വഴികളിലൂടെ ചുറ്റി വളഞ്ഞാണ് പ്രദേശത്തുകാർക്ക് യാത്ര ചെയ്യേണ്ടി വരുന്നത്.
പ്രശ്ന പരിഹാരം ഉടൻ ഉണ്ടായില്ലങ്കിൽ പ്രക്ഷോഭം നടത്താനാണ് പ്രദേശവാസികളുടെ തീരുമാനം.
കോഴിക്കോട് ബ്ലോക്ക് പഞ്ചായത്തിൻ്റെ ഫണ്ട് ഉപയോഗിച്ച് തോടിൻ്റെ വീതി കൂട്ടുന്നതിൻ്റെ ഭാഗമായി മെയ് മാസത്തിലാണ് പാലം പൊളിച്ചതെന്നും മഴ തുടർന്നതിനാൽ പ്രവർത്തി നടത്താനായില്ലന്നും ബ്ലോക്ക് പഞ്ചായത്ത് വൈസ് പ്രസിഡൻറ് എ പി സെയ്താലി പറഞ്ഞു. അടിയന്തിരമായി താൽകാലിക പാലം ഒരുക്കുമെന്നും അദ്ദേഹം കൂട്ടിചേർത്തു.
അതേ സമയം തോടിൻ്റെ വശങ്ങൾ കെട്ടി ഉയർത്തിയ ശേഷം തോട് മൂടി സ്ലാബിടാനുള്ള നീക്കമാണ് പ്രവർത്തിക്ക് പിറകിൽ എന്ന അക്ഷേപവും ഇപ്പോൾ ഉയർന്നിട്ടുണ്ട്‌. ഇതേ ഭാഗത്ത് 70 മീറ്ററോളം നീളത്തിൽ തോടിന് മുകളിൽ കോൺക്രീറ്റ് സ്ലാബ് ഇട്ട അനധികൃത നിർമ്മാണം മുമ്പ് നടന്നിട്ടുമുണ്ട്.
ഒരു അഭിപ്രായം പോസ്റ്റ് ചെയ്യൂ