കോഴിക്കോട്
23 മെയ് 2026
വയോധികനെ ആക്രമിച്ച് പേഴ്സും പണവും മോഷ്ടിച്ച മേരിക്കുന്ന് പൂളക്കടവ് സ്വദേശി പുതിയേടത്ത് വീട്ടിൽ ബെന്നി ലോയ്ഡ് (47) നെ കോഴിക്കോട് സിറ്റി ഡെപ്യൂട്ടി പോലീസ് കമ്മീഷണറുടെ നേതൃത്വത്തിലുള്ള സിറ്റി ക്രൈം സ്ക്വാഡും കസബ പോലീസും ചേർന്ന് പിടികൂടി.
കോഴിക്കോട് പാളയം ബസ് സ്റ്റാന്റ് പരിസരത്ത് വെച്ച് നല്ലളം കൊളത്തറ സ്വദേശിയായ 58 കാരനെ ആക്രമിച്ച് പരിക്കേല്പിക്കുകയും പോക്കറ്റിലുണ്ടായിരുന്ന പണവും പേഴ്സും തട്ടിപ്പറിച്ച പ്രതിയെ വയോധികന്റെ പരാതിയിൽ കസബ പോലീസ് കേസ് രജിസ്റ്റർ ചെയ്ത് അന്വേഷണം നടത്തി വരവെ പ്രതിയെ മാവൂർ റോഡിൽ വെച്ച് കസ്റ്റഡിയിലെടുക്കുകയായിരുന്നു. പ്രതിയ്ക്ക് കോഴിക്കോട് ജില്ലയിലെ വിവിധ പോലീസ് സ്റ്റേഷനുകളിലായി മയക്കുമരുന്ന് ഉപയോഗം, കൈവശം വെക്കൽ, മോഷണം, പിടിച്ചുപറി, പൊതുസ്ഥലത്ത് വെച്ച് മദ്യപാനം, അടിപിടി മറ്റുമായി നിരവധി കേസുകൾ നിലവിലുണ്ടെന്ന് പൊലീസ് പറഞ്ഞു.
കസബ പോലീസ് സ്റ്റേഷൻ സബ് ഇൻസ്പെക്ടർ നിമിൻ.കെ.ദിവാകരൻ, അസിസ്റ്റന്റ് സബ് ഇൻസ്പെക്ടർ സജേഷ് കുമാർ, സിറ്റി ക്രൈം സ്ക്വാഡ് അംഗങ്ങളായ അബ്ദുറഹ്മാൻ, അനീഷ് മൂസേടൻ, ഹാദിൽ കുന്നുമ്മൽ, ഷാഫി പറമ്പത്ത്, ഷഹീർ പെരുമണ്ണ, ജിനേഷ് ചൂലൂർ, രാകേഷ് ചൈതന്യം എന്നിവർ ചേർന്നാണ് പ്രതിയെ പിടികൂടിയത്. അറസ്റ്റ് രേഖപ്പെടുത്തിയ ശേഷം പ്രതിയെ കോടതിയിൽ ഹാജരാക്കി.