വന്യജീവി വംശവർദ്ധനവ്.. കോടതിയെ സമീപിക്കും.. മന്ത്രി ..

കോഴിക്കോട്

15 ജനുവരി 2023

കേരളത്തിലെ വന്യ ജീവികളുടെ വംശ വർദ്ധനവ് തടയാനുള്ള അനുമതിക്കായി സുപ്രീം കോടതിയെ സമീപിക്കുമെന്ന് സംസ്ഥാന വനം വകുപ്പ് മന്ത്രി എകെ ശശീന്ദ്രൻ. വയനാട്ടിൽ കടുവയുടെയും ആനയുടെയും അക്രമണം തുടരുന്ന സാഹചര്യത്തിലാണ് മന്ത്രിയുടെ പ്രസ്താവന.

അടിയന്തിര പ്രാധാന്യമുള്ള വിഷയമായി ഇക്കാര്യത്തിൽ കോടതിയിൽ ഹർജി നൽകാനാണ് ഉദ്ദേശിക്കുന്നതെന്നും ഇക്കാര്യത്തിൽ സംസ്ഥാന സർക്കാർ നിയമോപദേശം തേടിയിട്ടുണ്ടെന്നും അദ്ദേഹം വ്യക്തമാക്കി. വന്യമൃഗ ശല്യത്തെ കുറിച്ച് പഠിക്കാൻ 

കെ എഫ് ആർ ഐ യെ

ചുമതലപ്പെടുത്തിയിട്ടുണ്ട് എന്നും

മന്ത്രി കൂട്ടിച്ചേർത്തു.

കടുവയുടെ ആക്രമണം തുടരുന്ന സാഹചര്യത്തിൽ നാളെ വയനാട്ടിൽ സർവകക്ഷി യോഗം ചേരുമെന്ന് മന്ത്രി പറഞ്ഞു. 

ഇതിൽ ഉയരുന്ന നിർദേശങ്ങൾ സർക്കാർ ഗൗരവമായി എടുക്കും. ദ്രുത കർമ സേനയുടെ അംഗ ബലം കൂട്ടും. ജനത്തിന്റെ ജീവൽ പ്രശ്നങ്ങൾ രാഷ്ട്രീയ ആയുധമാക്കരുത്. സമരമല്ല സഹകരണമാണ് ഈ വിഷയത്തിൽ വേണ്ടതെന്നും മന്ത്രി ആവശ്യപ്പെട്ടു.

കഴിഞ്ഞ രണ്ട് മൂന്ന് വർഷമായാണ് ഈ നിലയിൽ വന്യജീവി ആക്രമണം വർധിച്ചത്. പല പഠനങ്ങളും ഈ വിഷയത്തിൽ നടത്തി. ഇവയൊന്നും യുക്തിസഹമല്ല. 

വനത്തിനകത്ത് ആവാസ വ്യവസ്ഥയിൽ മാറ്റമുണ്ടായിട്ടുണ്ട്. വന്യമൃഗങ്ങൾക്ക് കാട്ടിൽ ഭക്ഷണവും വെള്ളവും കിട്ടുന്നില്ല. വംശ വർധനവും ഉണ്ടായി. കടുവകൾക്കൊക്കെ കാട്ടിൽ നിശ്ചിത സ്ഥലം ആവശ്യമാണ്. അത് ഇപ്പോൾ ഇല്ലാത്ത സ്ഥിതിയാണെന്നും അദ്ദേഹം പറഞ്ഞു.
നിയമ നിർമ്മാണം ആവശ്യമെങ്കിൽ അത് ചെയ്യും. ആഫ്രിക്കൻ രാജ്യങ്ങൾ മാത്രമാണ് വംശവർധന തടയാനുള്ള നടപടികൾ പരീക്ഷിച്ചത്. മറ്റ് രാജ്യങ്ങൾ ഇത് ചെയ്തിട്ടില്ല. 2013 ൽ സുപ്രീം കോടതി വിധി പശ്ചിമ ബംഗാൾ സർക്കാർ ഉത്തരവ് മരവിപ്പിച്ചിരുന്നു. ഇതുവരെ അതിലൊരു നടപടിയും ഉണ്ടായില്ല. ഈ സാഹചര്യത്തിലാണ് സുപ്രീം കോടതിയിൽ അടിയന്തിര ഹർജി സമർപ്പിക്കുന്നത്. എന്നാൽ മറ്റ് സംസ്ഥാനങ്ങളിൽ പ്രശ്നം ഇത്ര രൂക്ഷമല്ലെന്നും മന്ത്രി ചൂണ്ടിക്കാട്ടി.

വയനാടൻ കാടുകൾക്ക് ഉൾക്കൊള്ളാനാവാത്ത വിധം കടുവകളുടെ എണ്ണം വർദ്ധിച്ചതായി റിപ്പോർട്ടുകൾ ഉണ്ട്. വനഗ്രാമങ്ങളിൽ നിന്നും ജനങ്ങളെ ഒഴിപ്പിക്കുന്നതിൻ്റെ ഭാഗമായി ഒഴിഞ്ഞു പോകാൻ സന്നദ്ധതയുള്ളവരുടെ ഭൂമിയുടെ രേഖകളുടെ പകർപ്പുകളും അധികരികൾ ശേഖരിക്കുന്നുണ്ട്.

അതേ സമയം വനാന്തരത്തിലെ പട്ടയഭൂമികൾ വൻകിടക്കാർ വാങ്ങി കൂട്ടുന്ന വിവരവും പുറത്ത് വരുന്നുണ്ട്. കുടിയൊഴിയാൻ നിർദ്ദേശിച്ച സ്ഥലങ്ങളിൽ തന്നെ ഇവർക്ക് വസ്തു രജിസ്ട്രഷൻ ചെയ്തു നൽകുന്നു എന്നത് ദുരൂഹത ഉയർത്തുന്നുണ്ട്.