ബത്തേരി
22 നവംബർ 2023
സംസ്ഥാനത്ത് മാവോയിസ്റ്റുകള്‍ പോലീസ് സ്റ്റേഷനുകള്‍ ആക്രമിക്കാന്‍ സാധ്യതയെന്ന് റിപ്പോര്‍ട്ട് . വയനാട് ജില്ലയിലെ തൊണ്ടര്‍നാട്, തലപ്പുഴ, തിരുനെല്ലി സ്റ്റേഷനുകളാണ് മാവോയിസ്റ്റുകള്‍ ആക്രമിക്കാന്‍ ലക്ഷ്യമിട്ടതെന്ന് വ്യക്തമാക്കി കേന്ദ്രരഹസ്യാന്വേഷണ വിഭാഗം മുന്നറിയിപ്പ് നല്‍കി.
ഈ സാഹചര്യത്തില്‍ കൂടുതല്‍ തണ്ടര്‍ബോള്‍ട്ട് കമാന്‍ഡോ സംഘത്തെ സ്റ്റേഷനുകളില്‍ വിന്യസിപ്പിച്ചു. നേരത്തെ തന്നെ പരിശീലനം ലഭിച്ച സായുധ സേനാ വിഭാഗത്തെ ഈ സ്റ്റേഷനുകളില്‍ വിന്യസിപ്പിച്ചിരുന്നു. ഇതു കൂടാതെയാണ് കൂടുതല്‍ തണ്ടര്‍ബോള്‍ട്ട് സേനാംഗങ്ങളെ അയച്ചത്. ഒറ്റപ്പെട്ട ഇടങ്ങളിലെ ബാങ്കുകൾ, എ ടി എം കൗണ്ടറുകൾ, പെട്രോൾ പമ്പുകൾ എന്നിവക്കും സുരക്ഷാ മുന്നറിയിപ്പ് നൽകിയിട്ടുണ്ട്.
നിലമ്പൂരില്‍ പോലീസുമായുണ്ടായ ഏറ്റുമുട്ടലില്‍ മരിച്ച കുപ്പുദേവരാജന്റേയും അജിതയുടേയും ചരമവാര്‍ഷിക ദിനമാണ് നവംബര്‍ 24. ഇതിന് മുന്നോടിയായി പോലീസിന് നേരെ തിരിച്ചടിക്കാൻ മാവോയിസ്റ്റുകെ പദ്ധതിയുണ്ടെന്നാണ് വിലയിരുത്തല്‍. നിലവില്‍ തിരുനെല്ലി പോലീസ് എയ്ഡ് പോസ്റ്റ് രാത്രി അടച്ചിടാന്‍ നിര്‍ദേശം നല്‍കിയിട്ടുണ്ട്. രാത്രി ഏഴു മുതല്‍ രാവിലെ ഏഴുവരെ എയ്ഡ് പോസ്റ്റ് അടച്ചിടാനാണ് വയനാട് ജില്ലാ പോലീസ് മേധാവിയുടെ നിര്‍ദേശം.
അയ്യന്‍കുന്ന് ഉരുപ്പുംകുറ്റി ഞെട്ടിത്തോട് തണ്ടര്‍ബോള്‍ട്ടും മാവോയിസ്റ്റുകളും ഏറ്റുമുട്ടിയിരുന്നു. വെടിവെപ്പിൽ രണ്ട് മാവോയിസ്റ്റുകൾക്ക് പരിക്കേറ്റതായി സൂചനയുണ്ടെങ്കിലും മാവോയിസ്റ്റ് സംഘം തിരുനെല്ലി, കമ്പമല ഭാഗത്തേക്ക് കടന്നതായാണ് പൊലീസ് നൽകുന്ന വിവരം.
ഇതിനോടകം എട്ട് പേർ പോലീസുമായുള്ള ഏറ്റുമുട്ടലില്‍ മരിക്കുകയും ബി.ജി. കൃഷ്ണമൂര്‍ത്തി ഉള്‍പ്പെടെയുള്ള നേതാക്കളെ പൊലീസ് പിടികൂടുകയും ചെയ്തിട്ടുണ്ട്. നിലവില്‍ പ്രതിസന്ധിയിലായ മാവോയിസ്റ്റുകള്‍, തിരിച്ചടിയിലൂടെ നഷ്ടപ്പെട്ട പ്രതാപം വീണ്ടെടുക്കാൻ ശ്രമിക്കുമെന്നാണ് പൊലീസ് കരുതുന്നത്. സംഘടനയിലേക്ക് കൂടുതല്‍ യുവാക്കളെ ആകര്‍ഷിക്കുന്നതിനുള്ള ഏകമാര്‍ഗം പോലീസിന് നേരെയുള്ള തിരിച്ചടിയാണ്. ഈ സാഹചര്യത്തിലാണ് മൂന്ന് സ്റ്റേഷനുകളിലും അതീവ ജാഗ്രതാ നിര്‍ദേശം നല്‍കിയത്. വയനാട്ടിലെ മറ്റു പോലീസ് സ്റ്റേഷനുകളിലും അധിക സുരക്ഷ ഉറപ്പാക്കിയിട്ടുണ്ട്.
ഒരു അഭിപ്രായം പോസ്റ്റ് ചെയ്യൂ